Saturday, October 7, 2017

අප හැරගිය පියා පිළිබඳ මා දුටු සිහින.

  මගේ පියා මියගොස් ඊයේට ( 2017-10-06)  මාසයක් සම්පූර්ණ විය.
ඒ වෙනුවෙන්  ගමේ පංසලට දානයක් පූජා කලෙමු. පියා මෙන්ම මමත් පංසල් යෑමට වැඩි උනන්දුවක් ඇති අය නොවන නිසා එම දාන වලට සම්බන්ධ චාරිත්‍ර තරමක් නුහුරු විය.
  පියා මියගොස් කලක් ගෙවුනද අප නිවසේ  ඉස්තෝප්පුව ලෙස සැලකියහැකි සාලසේ ඉදිරිපස කොටසේ ඇති පුටුවල ඔහු වාඩිවී බුලත් විට සපනු මට තවමත් මැවී පෙනේ.
එම දසුන මට ගෙනෙන්නේ සතුට හා දුක මිශ්‍ර හැඟීමකි. එසේම ඔහු පිලිබඳ සිහිවනවිට තවමත් මගේ පපුවට සියුම් බර ගතියක් දැනේ.


  ඔහු මියගිය පසු ඔහුව සිහිනෙන් දුටු වාර ගණන දන්නා තරමින් දෙකකි. එම සිහින දෙක අමතක වීමට පෙර සටහන් කිරීමට සිතුනි.


1. පළමු සිහිනය දුටුවේ ඔහු මියගොස්  දෙසතියකට පමණ පසුය.

සවස් වරුවක මා නිවසට යනවිට ඉතා උස පුද්ගලයෙක් දොරකඩ සිටගෙන සිටිනු දුටිමි. ඔහුගේ මුහුනේ කිසිදු හැඟීමක් දිස් නොවුනු අතර, මුහුන සහ සිරුර


පියාගේ සිරුරට සහ මුහුනට වඩා වෙනස් විය.

නමුත් ඔහු දුටුවිට ඒ මාගේ මියගිය පියායැයි මට සිතුනි. මට මාගේ පියා මියගොස් නැතැයි සිතුනි.

මම "තාත්තේ" යනුවෙන් ඔහුව ඇමතුවෙමි.

ඔහු නිහඬව නිවස තුලට ගොස් ඇඳක මුනින් අතට වැතිරුනි.

මම ඔහුගේ පිටඅතගෑවෙමි. ඔහුගේ සම ඉතා සිනිදු වූ අතර කොඳු නාරටියේ ඇලිය දිගේ තුනටිය අසල සහ බෙල්ලට පහලින් දික් අතට සැත්කම් කැලැල්


දෙකක් දක්නට ලැබුනි.

සැත්කමක් කර පියාගේ ජීවිතය බේරාගත් වගක් මට සිහිවිය.

සිහිනය නිමවිය.


2. දෙවන සිහිනය දුටුවේ පලමු සිහිනය දැක දින තුන හතරකට පසුය.

ඒ රාත්‍රී කාලයයි.  පසලොස්වක දිනක් වියයුතුය. හොඳින් සඳ පායා පරිසරය ආලෝකවත්ව තිබුනි.

දිවා කල වැටුනු වැස්ස නිසා පරිසරය තෙත් වී තිබුනි. ඒ වනවිට වැස්ස නැතත් පරිසරය සිහිල්විය.

මගේ පියාගේ පුරුද්දක් වූයේ වැසි වැටෙනකල තොප්පියක් පැළඳ

නිවස පිටුපස පස් කණ්ඩියෙන් පස් කපා, බාල්දියකට පුරවාගෙන ගොස් වතුර වලවල් පිරවීම සහ

 දියපාරවල්  දෙපසට දමා දියපාරවල මඟ ඔහුට සුදුසු ලෙස සකස් කිරීමයි.

මෙම සිහිනයේදී ඔහු අත් දෙකට පස් බාල්දි දෙකක් රැගෙන මා දෙසට පැමිනෙනු දුටිමි.

ඔහු මළ බව දැනසිටි මා ඔහු අමතා.

"තාත්තේ ඔයා දැන් විවේක ගන්න,

ඔය වැඩේ මට බාර දෙන්න"

යනුවෙන් කාරුණිකව පැවසුවෙමි.

මා සමඟ කිසිවක් නොකී ඔහු, කිසි විරෝධයක් නොදක්වා පස් පිරවූ බාල්දි දෙක මා අතට දී ආපසු හැරී ඈතට ගොස් අන්ධකාරයට මුසුවිය.

ඉන්පසු ඔහු ගිය දෙසින් ඒ වනවිට නිවසින් බැහැර ගොස් සිටි මගේ මව සුදු සාරියකින් සැරසී මා සිටි දෙසට පැමිනෙනු දිටිමි.

මව පැමිනෙන විට මා අත වූ පස් බාල්දි දෙක අතුරුදහන් ව තිබූ බවක් ගැනද අපැහැදිලි මතකයක් ඇත.

සිහිනය නිමවිය.


මෙම සිහින දෙක ගැන ඔබගේ අදහස් දැනගැනුමට කැමැත්තෙමි.


Tuesday, June 20, 2017

අපේ කාලයේ කාටුන්.

ඒ කාලයේ මිනිසුන් කල වැඩ වලින් 1%ක් වත් මේ කාලයේ උන්ට කරන්ට බැරිය.
දැන් කාලේ හැම දෙයක්ම බාල ය. මේ විදියට ගියෙත් තව පරම්පරා කිහිපයකින් ලෝකය 
විනාශයෙනු ඇත.
ඒ කාලයේ අපි බැලූ කාටුන් සමඟ සැසඳීමේදී මේ කාලයේ හැදෙන කාටුන් මොනවාදැයි සිතේ.
මෙහෙම ගියොත් තව වසර 10කින් පමණ කාටුන් කලාව නැතිවී යනු ඇත.
ඒ නිසා ඒකාලේ කාටුන ගැන බාල පරපුර දැනුවත් කිරීම වැඩිහිටියන් වන අපේ යුතුකමකි. 
෴෴෴
    පැරණි කාටුන් ගැන සැලකීමේදී "දොස්තර හොඳහිත", "සූර පප්පා" වැනි වඩා ජනප්‍රිය
 සහ නැවත විකාශන සිදුවූ කතා මඟහැර මේ වනවිට බොහෝ දෙනෙකුට අමතකව ගිය 
එහෙත් රසවත් කාටුන ගැන කතා කෙරුමට බලාපොරොත්තු වෙමි
  
1.Voltron 
 
  මෙහි නම හුරු නැතිවිය හැක.
නමුත් මෙහි එක කොටසක් හෝ නැරඹුවේ නම් මේ කාටුනය කිසිදාක අමතක නොවනු ඇත.
කථා සාරාංශය සැලකුවහොත් පෘථිවියෙන් යන අභ්‍යාවකාශගාමීන් හතර දෙනෙක් මිනිසාට සමාන ජීවින් සිටින 
ලොවකට‍ ගොඩබායි. එහි රජතුමාට රොබෝ සිංහයන් පස් දෙනෙකු සිටියි.අභ්‍යවකාශ ගාමින් සිව් දෙනාට සහ
 රජුගේ දියණියට මෙම රොබෝවරුන් හැසිරවීම බාර වෙයි.  මෙම රොබෝ සිංහයන් ට වෙන වෙනම සටන්කළ 
හැකි අතර අවශ්‍ය විටෙක එකට එක්වී මානවරූපී රොබෝ වෙකු (රොබෝ සිඤ්ඤෙකු) බවට පත්විය හැක.
 මොවුන්ගේ වීරක්‍රියා මෙම කාටුනය තුලින් දැක්වේ.මෙම කථා මාලාවේ නව සංස්කරණයක් ළඟදී විකාශය 
විමට නියමිතය.මෙය මතක හැටියට 1994 වසරේ ස්වාධීන රූපවාහිනියේ විකාශය වූවකි.
මෙය ඇමෙරිකා එක්සත් රාජ්‍යයේ 1984 වසරේ මුලින් විකාශය වූවකි.
https://en.wikipedia.org/wiki/Voltron 
 
 2. Macron 1 
 මෙය ජාතික රූපවාහිනියේ විකාශය වූවකි. Voltron තුලින් ආභාශය ලැබූ එකකැයි සිතේ. 
මෙහි රොබෝ සමුරායි වරයෙකු සිටියි.  Voltron ගැන සොයද්දී මෙයද හමුවිය. 
 https://en.wikipedia.org/wiki/GoShogun
 
3.Maxie's World 
 
 මෙය කොතෙක් ජනප්‍රිය දැයි නොදනිමි. ‍නමුත් මෙය මගේ ප්‍රියතම කාටුනයකි. https://www.youtube.com/watch?v=lESM_93rzys මෙහි තේමා ගීතය ඇසූ විට මෙය මතකයට නැඟෙනු ඇතැයි සිතමි. මෙය 1996 වසරේ ජාතික රූපවාහිනියේ විකාශය වූවකි. මෙය ඇමෙරිකා එක්සත් ආජ්‍යයේ 1987 වසරේ මුලින් විකාශය වූවකි. මෙය මෙය ළමා කාටුනයකට වඩා නහඹරයන්(Teenager) ඉලක්ක කරගෙන සැදූ එකකි.  
අන්තර්ජාලයෙන් මෙහි කොටස් කිහිපයක් සොයාගත හැකිවිය.
 මෙය 1987 වසරේ ඇමෙරිකා එක්සත් රාජ්‍යයේ විකාශය වූවකි
 මෙහි විකාශනයත් සමඟම බාර්බි බෝනික්කියන් හා තරඟකාරී ලෙස මැක්සි බෝනික්කියන් නිශ්පාදනය සිදුවී ඇත.
https://en.wikipedia.org/wiki/Maxie%27s_World
 සිරස TV නාලිකාව මඟින් මීට සමාන තේමාවකින් යුත් Jem කාටුනය විකාශය විය.
https://en.wikipedia.org/wiki/Jem_(TV_series) 
 
 4.ThunderCats
 
මතක හැටියට මෙහි එක් කොටස් මාලාවන් 1992 වසරේ විකාශය විය අනෙක 1997 පමණ විකාශය විය. ඇමෙරිකා එක්සත් රාජ්‍යයේ දී 1985 වසරේ මෙහි මුල් විකාශය ඇරඹී ඇත. යම් ග්‍රහ ලොවකට ගොඩබසින බළල් පවුලේ සාමාජිකයන්ගේ ලක්ෂණ සහිත මානවරූපී ජීවින් පිරිසක් 
එහි වසන මානවරූපී ස්වදේශික සත්වයන්ට පිහිටවන අයුරු මෙහි නිරූපනය වේ. 
බිළාල-මානවයන්ට නම් දමා ඇත්තේ බළල් පවුලේ සාමාජිකයින්ගේ නම් වලිනි. 
Lion-O(ප්‍රධාන වීර චරිතය), Jaga, Tygra,Panthro,Cheetara,WilyKit,WilyKat,Bengali
ThunderCats වරුන්ට ThunderTank නම් අපූරු යුධ රථයක්ද ඇත.
 
 ප්‍රධාන දුෂ්ඨ චරිතය වන්නේ පිරමීඩයක හැඩයේ බලකොටුවක වසන මමියකට (Mummy) සමාන පෙනුමක් ඇති  
Mumm-Ra .
https://en.wikipedia.org/wiki/ThunderCats

5.SilverHawks 
   
මෙය මුලින්ම ලංකාවේ විකාශය වූ වසර නොදනිමි. මෙය අප නිවසේ ස්වාධීන රූපවාහිනිය නැරඹීම ඇරඹු කාලයේ විකාශය වූවකි. මෙය කිහිප වරක් විකාශය වුවද ළඟදී විකාශ නොවුණු කාටුනයකි. මට කුඩාකල තාරකා විද්‍යාව ගැන උණක් තිබුණි. මෙම කාටුනයට හිත ඇදීමට එයද හේතුවිය. මෙහි චරිත අතරින් වැඩියෙන්ම මගේ සිත ගත්තේ ප්‍රධාන දුෂ්ඨයා වන Mon*Star https://www.youtube.com/watch?v=ql5q4TYxDgs Mon*Starගේ බලකොටුව පිහිටා ඇත්තේ Moonstar යනුවෙන් හඳුන්වන තරුව වටා යන ග්‍රහ ලොවේ ඇති 
තාරකාවක හැඩය ඇති ආවාටයක් තුල ය. Mon*Star ගේ එක ඇසක් අන්ධ ය
Moonstarහි ඔහු සිටින ග්‍රහ ලොවේ ඇති උපකරණවලින් Moonstarවෙත යවන ආලෝකය එහි වැදී පරාවර්තනය පැමිණ 
එම අන්ධ ඇසට වැටුන විට ඔහු යෝධයෙකු බවට පත්වෙයි.  
ඉන්පසු ඔහු සුරතලයට ඇතිකරන බූවල්ලාට එම ඇසෙන් තරුවක හැඩය ඇති රැස් වළල්ලක් යවයි.
 එවිට ඌ Mon*Star ගේ නිල රථය බවට පත්වෙයි.
කාටුනය අවසානයේ තාරකා විද්‍යා පාඩමක් ද ඇතුලත් වෙයි.
https://en.wikipedia.org/wiki/SilverHawks
මෙය 1986 වසරේ ඇමෙරිකා එක්සත් රාජ්‍යයේ විකාශය වූවකි. 
  
6. She-Ra: Princess of Power 
  
මතක හැටියට මෙය 1995ට පෙර ස්වාධීන රූපවාහිනියේ විකාශය වු එකකි. ප්‍රධාන චරිතය වනුයේ Adora කුමරියයි. ඇය සතු මැණිකක් ඔබ්බවූ කඩුවක ඇති මායා බලයෙන් ඇය She-Ra බවට පත්වෙයි.  
එම කඩුව‍ට බලය ලැබෙනුයේ Crystal Castle යනුවෙන් හඳුන්වන බලකොටු වෙනි. මම එකල  Crystal Castle හි චිත්‍ර ඇන්දෙමි.
මෙහි ප්‍රධාන දුෂ්ඨ චරිතය Hordak.
https://en.wikipedia.org/wiki/She-Ra:_Princess_of_Power
මෙය 1985 වසරේ ඇමෙරිකා එක්සත් රාජ්‍යයේ විකාශය වූවකි. 
  
7.Captain Zed and the Zee Zone 
  
මෙය වැඩි දෙනෙකුට මතක නැති කාටුනයක් වියයුතුය. Captain Zed යනු සිහින ලෝකයේ චරිතයකි.  
ඔහුගේ රැකියාව වන්නේ කුඩා ළමුන්ට භයානක සිහින පෙනීම වැලැක්වීම යි.  
මෙය මා සිත් ගත්තේ මෙම අමුතු තේමාව නිසාය.
මෙය බිරිතානියේ 1991 වසරේ මුලින්ම විකාශය වූවකි.
ජාතික රූපවාහිනියෙහි 1992 පමණ විකාශය විය.
https://en.wikipedia.org/wiki/Captain_Zed_and_the_Zee_Zone 
 
8. Care Bears 
 
 කුඩා දරුවන් ඉලක්ක කරගත් කාටුන් වැඩසටහනකි. කුඩා දරුවන්ට පිහිටවන, මායා බලයක් සහිත වලසුන් පිරිසක් පිළිබඳ කතාවකි. ඇමෙරිකා එක්සත් රාජ්‍ය යේදී 1985 වසරේ මෙහි මුල් විකාශය ඇරඹී ඇත. https://en.wikipedia.org/wiki/Care_Bears 
 
9. Adventures of the Gummi Bears 
 
මෙය ඩිස්නි සමාගමේ කාටුනයකි.
ජාතික රූපවාහිනියේ විකාශය වූ අතර විකාශය වූ වසර ගැන මතකයක් නැත.1996 වියයුතු යැයි සිතේ.
කැලෑවක් මැද අප්‍රසිද්ධියේ ජිවත් වන මානවරූපී වලස් පවුලක් වටා කතාව ගෙතී ඇත.
ඇමෙරිකා එක්සත් රාජ්‍යයේ දී 1985 වසරේ මෙහි මුල් විකාශය සිදුවී ඇත.
https://en.wikipedia.org/wiki/Disney%27s_Adventures_of_the_Gummi_Bears 
 
10. Star Trek: The Animated Series 
 
මෙම ලිපිය බලන අය අතරStar Trek ගැන නොදන්නා අය ඇතැයි නො සිතමි. නමුත් Star Trek: The Animated Series කාටුනය ගැන නොදන්නා අය සිටිය හැක.  
මෙය 1991 හෝ 1992 දී ලංකාවේ විකාශය විය. මතක හැටියට ජාතික රූපවාහිනියේ වියයුතුය.  
එක කොටසක් පැයක පමන කාලයක් විකාශය වූ  බව මතකය.
 ඔය කාලයේදීම 1968 දී තනන ලද Star Trek මුල් ටෙලිනාට්‍ය මාලාව ද විකාශය වූවා මතකය.
එකල මගේ වයසේ හැටියට මෙම කාටුනය බර වැඩි විය. එමනිසා අන්තර්ජාලයෙන් මෙය නැවත නැරඹිය යුතුයැයි හැඟේ.
මුල් Star Trek කථා සැලකිය හැක්කේ විද්‍යා ප්‍රබන්ධ ලෙස නොව
 විකල්ප  යථාර්ථවාදි ( Alternate reality) https://en.wikipedia.org/wiki/Alternate_reality කෘති ලෙසය.
මෙම කාටුනය ඇමෙරිකා එක්සත් රාජ්‍යයේ දී 1973 වසරේ මෙහි මුල් විකාශය සිදුවී ඇත. 
 
11. Walter Lantz මහතා තැනූ 

Chilly Willy
TheBeary Family (වලස් මාමා)


කාටුනද කුඩාකල නැරඹූ ජාතික රූපවාහිනියේ විකාශය වූ ‍ කාටුන විය.



 
12. The Smurfs 
මෙය 1992 දී ජාතික රූපවාහිනියේ විකාශය වූවකි. ඇමෙරිකා එක්සත් රාජ්‍යයේ දී 1981 වසෙරේ මෙහි මුල් විකාශය සිදුවී ඇත.
 මෑතකදී මෙම චරිත යොදා තැනූ චිත්‍රපට නිපදවූ නිසා මෙය ගැන විස්තර කිරීම අනවශ්‍ය යැයි සිතමි. 
  https://en.wikipedia.org/wiki/The_Smurfs_(TV_series)
 
 කාටුන ගැන සොයද්දී දොස්තර හොඳහිත කතා මාලාවේ සිංහල හඬ කවා නැති කාටුන දෙකක්ද හමුවිය 
 
 "A Hatful of Rabbit" 
 
"The Barnyard Rumble"

Saturday, June 17, 2017

HTML අක්‍ෂර නාම (character entity)

HTML බාශාවෙන් වෙබ් පිටු සකස් කිරීමේදී එයට අකුරු ඇතුලත්කරන ක්‍රම දෙකක් පවතී.
එකක් වන්නේ කෙලින්ම අකුරු එක්කිරීමයි.
අනෙක අක්ෂරකේත යොදාගෙන එම අකුරු වෙබ් පිටුවට එක්කිරීමයි.
අක්ෂර කේත එක්කරන ක්‍රම 3ක් පවතී.
එනම්,
1. කේතයේ නමින් දැක්වීම
2. අක්ෂරයේ  යුනිකේත අංකය දහයේ පාදයේ සංඛ්‍යාවකින් දැක්වීම.
3. අක්ෂරයේ  යුනිකේත අංකය දහසයේ පාදයේ සංඛ්‍යාවකින් දැක්වීම යි.

උදාහරණයකින් පැහැදිලි කලහොත්
Ж අකුර,
Ж ලෙස කේතයේ නමින් ද
Ж ලෙස අක්ෂරයේ  යුනිකේත අංකය දහයේ පාදයේ සංඛ්‍යාවෙන්ද
Ж අක්ෂරයේ  යුනිකේත අංකය දහසයේ පාදයේ සංඛ්‍යාවෙන්ද වෙබ් පිටුවකට එක්කල හැක.

අක්ෂර සංකේත ක්‍රමය යොදා ගැනීමට හේතු කීපයක් පවතී.
1. < > & " ' අක්ෂර HTML බාශාවේ පිටු සැලසුම් කිරීමට යොදා ගන්නා නිසා ඒවා පාඨ කොටස් වලට එක්කිරීමේදී ගැටළු මතුවීම.
2. පාඨ වලට විවිධ ආකාරයේ හිස්තැන් අතුලත්කිරීමට.
3. යුනිකේත සඳහා සහය නොදක්නවන මදුකාංගවලදී යුනිකේත ලියවිලි හැසිරවීමට.
4.සමහර අක්ෂර ඇසින් බලා වෙන්කර හඳුනාගත නොහැක
උදාහරණයක් ලෙස ග්‍රීක කැපිටල් ඇල්ෆා අකුරත් ඉංග්‍රීසී කැපිටල් A අකුරත් හැඩයෙන් සමානය. නමත් පරිගණකයට ඒ අකුරු දෙකකි. එවන් අවස්ථා වල නිවැරදි අකුර නිවැරදිව ඇතුලත් කිරීමට.

අක්ෂර කේත සඳහා යොදන නම් ලැයිස්තුවක් සාදා ගැනීමට හැකිවිය. බොහෝ දුරට මෙහි සියළු නම් ඇතැයි සිතමි.

එම දත්ත ලබා ගැනීමට  පහත මෘදුකාංගයෙන් පුළුවන.

මෙහි නැති නාම ඇත්නම් දන්වන්න.

DOWNLOAD - EXE


DOWNLOAD - SRC

DOWNLOAD LIST

Wednesday, May 10, 2017

වෙසක් කූඩු



   ප්ලාස්ටික් වලින් සාදන ලද වෙසක් කූඩු රාමු මේ වනවිට වෙළඳපොලේ ඇත නමුත් අප කැමති ආකාරයේ ජ්‍යාමිතික හැඩතලයක් පහසුවෙන් සාදාගතහැකි ලෙස සැකසූ රාමු කට්ටලයක් නොදුටිමි.

   අනුක ව්‍යුහයන් ගොඩනැඟීමට ගන්නා බෝල කූරු ආකෘති වැනි කොටස් ඇති එකිනෙකට වෙනස් මූලික හැඩ 10ක් පමණ සෑදිය හැකි වෙක් කූඩු ආකෘති කට්ටලයක් සෑදීමට යම් ව්‍යාපාරිකයෙක් උනන්දු වන්නේ නම් මනාය.

   මෙවැනි කටයුතු වලට ප්‍රතිචක්‍රී කරණය කරන ලද ප්ලාස්ටික් යොදා ගන්නේ නම් වඩා සුදුසුය.

   මා මුලින් සිතා සිටියේ වෙසක් කූඩු සෑදීම බ්‍රිතාන්‍ය පාලන සමයේ මෙරටට පැමිණි චීන වෙළඳුන් හරහා අපට ලැබුනු දෙයක් ලෙසයි. නමුත් මෙය ඉන්දියාවේ හින්දූන් ගේ දීපාවලී සැරසිලි ආශ්‍රයෙන් ලැබුණ දෙයක් බව දැනගතිමි. මෙහි ඉතිහාසය ගැන වැඩි විස්තරයක් නොදනිමි. දන්නා අයෙකු වෙත්නම් වැඩිදුර දැනුවත් කරන්න.

   මෙවර වෙසක් කූඩුව සඳහා අටපට්ටම් 3ක් යොදාගෙන ඉහත දැක්වෙන කූඩුව සෑදුවෙමි. එයට රුපියල් 15ක් වැයවිනි. ලබන වර අටපට්ටම් හතරකින් චතුස්තලයක් සෑදීමට බලාපොරොත්තු වෙමි.

Tuesday, March 21, 2017

නිසල පොළොව

   ඉකොනොමැට්ටා බ්ලොග් අඩවියේ පලවූ අහසේ රිද්මය හා පොළොවේ රිද්මය
ලිපිය කියවීමෙන් පසු මෙය ලිවීමට සිතුනි.

   පෘථිවිය නිසලව පවතිද්දී  අනිකුත් ග්‍රහ වස්තු සහ ඛගෝලය පෘථිවිය වටා භ්‍රමණය වන්නේයැයි සලකනු ලබන පෘථිවි කේන්ද්‍රීය ග්‍රහ ආකෘතිය වෙනුවට,
   නිසල ඛගෝලයක් සහිත, භ්‍රමණයවන පෘථිවියක් සහිත  පෘථිවි කේන්ද්‍රීය ග්‍රහ ආකෘතියක් ඉදිරිපත්නොවුනේ ඇයිද?යනු මට කලකසිට පැවතුනු ගැටළුවකි.
එවැනි ආකෘතියක් අවබෝධකරගැනීම වඩාත් පහසු නොවේද?


නිසල පෘථිවිය > භ්‍රමණයවන පෘථිවිය > හිරු වටා පරිභ්‍රමණයවන පෘථිවිය


    ලෙස ග්‍රහ ආකෘති ක්‍රමයෙන් පරිනාමය නොවී නිසල ‍පෘථිවියක සිට පරිභ්‍රමණයවන පෘථිවියක් දක්වා පිම්මක් පැන්නේ ඇයි.

   මට සිතෙන අන්දමට මෙයට හේතුව මනෝ විද්‍යාත්මක කරුණකි.
තමා පයගසා සිටින පොළව චලනයවන්නේය යන  අදහස අතීතයේ සිටි සාමාන්‍ය ජනතාවට (හුදී ජනයාට) බියජනක හැඟීමක් ඇතිකිරීමට හේතුවන්නට ඇත.
   ඇත්ත වශයෙන්ම අපට පවා එය යම් ආකාරයක සියුම් තැතිගැන්මක් ඇති නොකරන්නේද?
   සමහරවිට මේ හේතුව නිසා පුරාණ තාරකා විද්‍යාඥයන් ඕනෑකමින්ම චලනයවන පෘථිවියක් පිළිබඳ මතයක් ඉදිරිපත්කිරීමෙන් වැලකී සිටියා වියහැක.

   මා, නලීන් ද සිල්වා මහතා ගැලීිලියෝ ගැන ලියා ඇති ලිපි කියවා ඇත. ඒවාට අනුව ,
කතෝලික සභාව පෘථිවිය චලනය වන්නේය යන අදහස සමාජයතුල පැතිරවීම පෙර පෘථිවිය චලනයවනබව එකල දැනුම ආශ්‍රයෙන් ඔප්පුකරන ලෙස ගැලීලියෝට දැන්වීය.
ගැලීලියෝ එම අනට අකීකරුව ඔප්පු කිරීමෙන් තොරව හිතුවක්කාරලෙස තම මතය ප්‍රසිද්ධ කලනිසා කතෝලික සභාව ඔහු නිවාස අඩස්සියට පත්කරන ලදී.
   මේ සම්බන්ධ නලීන් ද සිල්වා මහතා අපූරු රුවන් වැකියක් පවසනලදී


"පාප් වහන්සේ (බටහිරයන්) කියන තරම්ම නරක මිනිහෙක් නෙමෙයි" :D

   මෙම කරුණු ගැන වැඩිදුර තොරතුරු  දන්නා අයගේ ප්‍රතිචාර බලාපොරොත්තු වෙමි.

Wednesday, February 8, 2017

අභිරහස් ලේඛනයක්. වෝනිච් අත්පිටපත්(Voynich manuscript)





වෝනිච් ලියවිලි යනු මේ වන තෙක් ලොව කිසිදු විශේෂඥයෙකුට කියවා නො හැකි වූ අභිරහස් බසකින් ලියන ලද පැරණි ලේඛන විශේෂයකි.
රසායනික පරීක්ෂණ වලිත් සොයා ගෙන ඇති පරිදි, මෙම ලේඛන ලියා ඇත්තේ වසු පැටවුන්ගේ සමින් පිළියෙල කල පාච්මන්ට් පත්‍ර වල ය. කාබන් 14 කාල නීර්ණයට අනුව 1404 සහ 1438 අතර කාලයක මෙම ලිපි ලියා ඇති බව තහවුරු වී ඇත. ලිවීම සඳහා පාවිච්චි කර ඇත්තේ එකල පැවති මිල අඩු තීන්ත වර්ගයකි. පිහාටු පෑනකින් හෝ කටු පෑනකින් ලියා ඇත.
මෙම ලිපිවල කතුවරයා හෝ කතුවරයන් හඳුනා ගෙන නැත. පිටපත් කර ඇත්තේ පිරිමි අයකු බව අත් අකුරු අනුව විශ්වාස කෙරෙයි. චිත්‍ර සහ අකුරුවල ඇත්තේ යුරෝපීය ශෛලියකි. ලේඛන තුල කිසිදු වැරදි නිවැරදි කිරීමක් හමුවී නැත. එසේම මෙම ලේඛන කොටස් වශයෙන් ලියූ ඒවා නොව, එක්වර ම පිටපත් කර අවසන් කර ඇති ඒවා බව හඳුනා ගෙන ඇත. අත් අකුරුවල හැඩය අනුව මෙය පිටපත් කරුවන් දෙදෙනෙකු විසින් පිටපත් කර ඇතැයි ද මතයක් ඇත. මේ අනුව මෙම ලියවිලි හොඳින් සැලසුම් සහගත ව පිලියෙල කල ඒවා බව පැහැදිලි ය. දැනට හමුවී ඇත්තේ පිටු 240කි නමුත් පිටු අංක අනුව පිටු 270ක් පමණ තිබෙන්නට ඇතැයි සැලකේ.
දැනට වාර්තා වෙන අන්දමට මෙම ලේඛනවල මුල් ම අයිතිකරු වූයේ Georg Baresch නම් රස විද්‍යාඥයා ය (alchemist) නමුත් ඔහුට මෙම ලේඛන තේරුම් ගත නොහැකි විය. පසුව විවිධ පුද්ගලයන් අතට පත් වූ මෙම ලිපි කලක් අතුරුදහන් ව පැවතී පසුව පෝලන්ත ජාතික පුරාවස්තු එකතු කරන්නෙකු වන Wilfrid Voynich මහතා විසින් 1912 දී නැවත එකතු කරන ලදී. මෙයට වෝනිච් අත්පිටපත් යැයි නම් ලැබුණේ ඒ නිසා ය.
මේ වන විට ඒවා යේල් (Yele) විශ්ව විද්‍යාලයේ තබා ඇත.
මෙම ලේඛන ලියා ඇත්තේ හඳුනා නොගත් අක්ෂර විශේෂයකිනි. ලොව පුරා සිටි ඉහළ ම ගුප්ත ලේඛනඥයන් (cryptography) කිසිවකුටත් මෙය කියවිය නො හැකි වී ඇත. අවම වශයෙන් මෙම ලේඛන එකල පැවති බසකින් සකස් කර පසුව ගුප්ත ලේඛනයක් බවට හැරවූ ඒවා ද. නැතිනම් මෙම ලේඛන ලිවීම පිණිස ම සකස් කල කෘතිම බසකින් ලියූ ඒවා ද යන කරුණ වත් නිගමනය කර නැත.
නො දන්නා අක්ෂර වර්ගයට අමතරව ඇතැම් පිටුවල වාටියේ ලතින් අකුරු වලින් යම් වාක්‍ය සටහන් කර ඇති අතර එම වාක්‍ය වල තේරු මද අවබෝධ කර ගැනීමට තවම හැකි වී නැත. නිවැරදිව හඳුනා ගත හැක්කේ හින්දු අරාබි ඉලක්කම් වලින් කල පිටු අංක සහ සමහර රූප සටහන්වල ඇති බටහිර ජ්‍යෝතිශ්‍ය සංකේත කිහිපය පමණි. මෙම ලිපි ලිවීමේ දී එම නො දන්නා අක්‍ෂර තනි තනි අකුරු ලෙස මෙන් ම  වැල් අකුරු ලෙස ද කළවමේ යොදා ඇත. බහුලව යෙදෙන අක්ෂර 25ක් පමණ හඳුනා ගෙන ඇති අතර එයට අමතරව තවත් සංකේත සෑහෙන ප්‍රමාණයක් තිබේ. සමහර විට සමහර අකුරු (උදාහරණයක් ලෙස ග්‍රීක Π අකුර වැනි අකුර) දිගටි හැඩයකට ලියා එම අකුර තුල තවත් අකුරු ලියා ඇත.

පර්යේෂකයන් විසින්, මෙම ලිපි එකතුව එහි ඇති පින්තූර අනුව පරිච්ඡේද 6කට බෙදා ඇත

1.      ඖෂධ ශාක.

2.      තාරකා විද්‍යාව.

3.      ජීව විද්‍යාව.

4.      විශ්වය.

5.      ඖෂධ සෑදීම.

6.      බෙහෙත් වට්ටෝරු.
 



ලිපි එකතුවෙන් අඩක් පමණ සමන්විත වන්නේ ඖෂධ ශාක පරිච්ඡේදයට ය. එහි විවිධ පැළෑටි වර්ග වල රූප සටහන් සහ විස්තර අඩංගු ය. නමුත් එම පැළෑටි එකක් වත් නිවැරදිව හඳුනා ගත හැකි වී නැත.

තාරකා විද්‍යාව යටතේ තරු සිතියම් ලෙස හඳුනා ගැනෙන සටහන් ඇත.

ජීව විද්‍යා කොටස තුල නිරුවත් ස්ත්‍රී රූප විවිධ නාල පද්ධති පොකුණු වැනි දේ ඇඳ ඇත. මෙයින් දැක්වෙන්නේ ඖෂධ ස්නානය, හුමාල ස්නානය සහ දුම් ඇල්ලීම වැනි ප්‍රතිකාර ක්‍රම පිළිබඳ විස්තර යැයි මතයක් තිබේ.

එයට වෙනස් ව මෙම රූප වලින් සිරුරේ අභ්‍යන්තර අවයවවල ක්‍රියාකාරීත්වය පැහැදිලි කෙරෙති මතයක් ද මට හමුවිනි.

විශ්වය යන පරිච්ඡේදය සෑදී ඇත්තේ ඇකිළිය හැකි ලෙස සකස් කල පිටු 6ක ප්‍රමාණයේ තනි විශාල පත්‍රයකිනි. එය තුල වෘත්තාකාර හැඩතල 9ක් ඇඳ ඇත. ඊට අමතරව එය තුල සියුම් විස්තර ගණනාවක් අඩංගු ය.

ඖෂධ සෑදීම යටතේ විවිධ ශාක කොටස් සහ භාජන වැනි දේ වල රූප ඇඳ ඇත.

බෙහෙත් වට්ටෝරු කොටසේ රූප අඩංගු නැති අතර තරු ලකුණින් අංකනය කල ඡේද ලියා ඇත.

මෙම ලියවිලි ගැන විවිධ මත පලවී ඇත.


මෙහි ඇති මලක හැඩය ගත් රූප සටහනක් මඟින් ක්ෂීරපථ චක්‍රාවාටය නිරූපනය වන්නේ යැයි ද. මෙය යම් පිටසක්වළ ශිෂ්ටාචාරයක දැනුම අඩංගු එක්ක යැයි ද විශ්වාස කරන අය ද සිටිති.

මෙය යම් අප්‍රකට දේශ ගවේෂකයෙකු විසින් ඇමරිකා මහද්වීපයෙන් ගෙන එන ලද වෙද පොතක් ආශ්‍රයෙන් සකස් කල එකකැයි මතයක් ද පවතී. එයට අනුව මෙහි ඇඳ ඇති පැළෑටි ඇමර්සන් වනයේ ඇති නූතන විද්‍යාඥයන් විසින් හඳුනා නොගත් හෝ මේ වන විට වඳ වී ඇති පැළෑටි විය හැක.

තවත් මතයක් ලෙස මාර්කෝ පෝලෝ විසින් චීනයෙන් ගෙන එන ලද වෙද පොත් ආශ්‍රයෙන් මෙය සකස් කර ඇත. ඒ අනුව මෙම ලියවිලි චීන භාෂාව සමඟ ගැලපුමට උත්සාහයන් ගෙන ඇති අතර ඒවා ද සාර්ථක වී නැත.

වෝනිච් අත්පිටපත්වල පින්තූර බැලීමට.

වැදගත් විය හැකි අතිරේක කියවීම්