මා දිවැස් ලැබූ සැටි.

 

මෙම අත්දැකීම වසර කීපයකට පෙර ලැබූ වකි.

මම මා හදමින් සිටි නිවසේ  කාමරයක පැදුරක් එලා ගෙන තනිව නිදා ගෙන සිටියෙමි.

කාමරය ට ජනේල සවි කර නොතිබිණි.

වෙලාව උදේ 3 පමණ විය යුතු ය.

එම අවස්ථාවේ අවට පරිසරය 90% අඳුරක තිබුනි.

අඩ නින්දේ සිට අවදි වූ මට අඳුරේ තිබුණු අවට පරිසරය මද වේලාවකට පසු දිවාකාලයේදී මෙන් පැහැදිලිව පෙනෙන්නට විය.

එම හැකියාව ක්‍රමයෙන් වර්ධනය වී නැවතත් ක්‍රමයෙන් නැතිවී ගියේය. සම්පූර්ණ කාලය විනාඩි 5ක් පමණ වියයුතුය.

එම දිවැස් හැකියාව උපරිම ව පැවති විට ඇස් පියාගෙන සිටියත් අවට දසුන පැහැදිලිව දිස්විය.

එම අවස්ථාවේ දැනුනේ සිහිනයක් දකින බව දැනගෙන සිහිනයක් දකිනවා වැනි හැඟීමකි.

සම්පූර්ණ කාලයම  පැදුර මත වැතිරී සිටියෙමි. නැගිට අවට ඇවිදිමින් දිවැස් හැකියාව පරීක්ෂා කිරීමට නොසිතුනේ මන්දැයි නොදනිමි.

සමහර විට වෙහෙස සහ නිදිමත නිසා වියයුතුය. සමහර විට බයක් දැනෙන්න ඇති.

නමුත් හිස එහා මෙහා හරවා දිවැස් හැකියාව පරීක්ෂා කලෙමි.

 

තේජෝ කසින භාවනාව කියා එකක් ගැන අසා ඇත. එයින් ද මෙයට සමාන අත්දැකීමක් ලැබිය හැකි බව අසා ඇත.

 

මා ලද අත්දැකීම ගැන පසුව සිතා බැලුවෙමි.

මගේ පැහැදිලි කිරීම මෙයයි.

මම දිවැස් අත්දැකීම ලද පරිසරය දිවා කාලයේ ඇති තරම් නිරීක්ෂණය කර තිබුනි.

එම නිසා එහි ත්‍රිමාන සිතියමක් නොදැනුවත්වම මොළය තුල ගොඩනැගී තිබුනි.

අඩ අඳුරු රැයක දී වුවත් අප එම පරිසරය තුල සිටින ස්ථානය සහ හිස හරවා සිටින දිශාව පැහැදිලිව අවබෝධ කරගත හැකි නම්, අඩ අඳුරෙ දකින දසුනේ අඩුපාඩු දිවාකල දුටු දසුන් වලින් ප්‍රතිසංස්කරණය කර දිවාකල මෙන් පෙන්වීමේ හැකියාව මොළයට ඇත.

සරලව කිවහොත් මෙහි දී මොළය කරන්නේ ව‘චුවල් රියැලිටි වැඩකි.

මම එම අවස්ථාවේ ඇවිද ගියා නම් දිගටම දිවැස් අත්දැකීම ලබන්නට ඉඩ තිබුනි. නමුත් යම් හේතුවකින් බංකුවක් වැනි අනපේක්ෂිත වස්තුවක් ඉදිරියට මුනගැසුනොත් එය දිවැසට හසුනොවනු ඇත.

එය සිරුරේ ගැටුනොත් මගේ දිවැස් බලය එකෙනෙහිම බිඳවැටී මුළු පරිසරයම සැනෙකින් අඳුරු වනු ඇත.

 

පාළු පාරක අඳුරේ ඇවිද යන අයෙක් හොල්මනකට බියවන විට වන්නේද මෙය විය හැක.

එම අවස්ථාවේ දී නොදැනුවත්වම ඔහු රාත්‍රියේ අඩ අඳුරේ දකින දසුන් සමග පෙර දිවා කාලයේ මතක ඔස්සේ  ලද දසුන් මිශ්‍රකර මනස විසින් ගොඩනගා ගත් දසුනක් දකිමින් යයි.

හදිසියේ අනපේක්ෂිත වස්තුවක් සිරුරේ ගැටුනොත් මෙම අථත්‍ය යථාර්ථ අත්දැකීම එකවරම කඩාවැටී මුලු පරිසරයම අඳුරු වී ඔහු බියවෙයි.

 

භාවනා යෝගියාගේ දිවැස් අත්දැකීම ද මේ ආකාරයට ම පැහැදිලි කල හැක.

භාවනා යෝගියා භාවනාව සඳහා තෝරා ගන්නේ බොහෝ විට තැනිතලා පොලවක් සහිත අතරින් පතර ගස් වවා ඇති අනාකූල පරිසරයකි.

එම අවස්ථාවක දිවැස් අත්දැකීම ලැබුව හොත් සෑහෙන කාලයක් එම පරිසරය තුල සක්මන් කරමින් ම එම අත්දැකීම ලබාගත හැක.

 

මම මේ කලේ මගේ අත්දැකීම ගැන මගේ පැහැදිලි කිරීමයි.

මෙම පැහැදිලි කිරීම පාලිත තත්ව යටතේ නැවත නැවත පරීක්ෂා කර තහවුරු කල නො හැකි බව කරුණාවෙන් සලකන්න.